MI DANG TÂRLAN THIAM

JOHANA 1:15,17
Johanan a thu a hriattîr a, a au va, “‘Ka hnunga mi zui tûr khân mi lehkhalh tawh a ni, ka hmaa awm tawh reng a nih avângin,’ tia a thu ka sawi kha amah hi a ni,” a ti a. Ani chu ka hnua lo kal tûr chu a ni a, a pheikhawk hrui phelh tlâk pawh ka ni lo ve,” a ti a, a chhâng a.

Baptistu Johana ropuina leh a entawn tlâk êm êmna chu Lal Isua a chawimawi thiam kha a ni. A huhova kan thawhnaah hian chawimawina leh hmingṭhatnate hi thawhpuite chan tûr awm lêk lova pum hmawm vek mai hi a awl hle a. Rawngbâwltute pawh hian mi dang aia lansarh duhna kan pu fo va, Lal Isua ngei pawh hi ropuina kan khum khalh fo âwm e! Mi tam takin kan hman uar êm êm chu ‘ka’ tih hi a ni a. Thawhhona ṭawngkam atân chuan ‘kan’ tih hi a mawi zâwk fo.

Mi tam tak chu mahni infak leh inchawimawi chîng kan ni a. Hei tak hi thawhpui leh ṭhiante tân ngaihthlâk a nuam lo ṭhin. Mahni inchawimawi dân ṭha chu mi dang chawimawi thiam hi a ni.