FIAMTHU

EPHESI 5:3-4
Nimahsela, mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngan lam pawh lamin awm suh se; zahmawh te, thu lawilo sawi te, fiamthu te pawh, chûng chu a mawi lo a ni; chûng tih ai chuan lâwm thu hrilh zâwk rawh u.

Fiamthu duh tak leh thiam tak bula awm hi a nuam a, biangki kham khawpa ṭhen reng mai pawh awl tak a ni. A thiam tân chuan tûnlaiah eizawnna tling leh awlsamtak a nihna chen pawh a awm ta. Tirhkoh Paulan lam rîk loh tûr a sawi zînga ‘fiamthu’ a târlang tel tlat hi chu chhût tham tak a awm.

Fiamthu hi thu lawi lo leh zahmawhte nên a kal kawpna chin a awm a. Mi ṭhenkhatin, “Paho ṭhukhâwm an nuih dar dar hi chuan zahmawh an sawi a ni ṭhin,” an tihte pawh hi a dikna chen a awmin a hriat. Fiamthu thawh hian ramri kham thiam a harsa a, thu bawlhhlawh leh zahmawh pui pui te, mi huat zâwngte pawh sawi mai a awl a; chuvângin Paula hian a duh lo niin a lang.

Lal Isua nun kha ngun takin thlirlêt ila, kum thum leh a chanve vêl rawng a bâwl chhûng khân thu a sawiin a zirtîr tih kan hria a, hla a sak pawh kan hria a, a nuih erawh chu hriat tûr a awm hauh lo thung. Fiamthu kan thawh anih pawhin i fimkhur ang u.