THLARAU RAH – ṬHATNA

2 THESSALONIKA 1:11
Chutianga chawimawi leh mak tih a nih theih nân, kan Pathianin a kohna che uah chuan koh tlâk nia a ruat theihna tûr che u leh, ṭhat duhna tinrêng leh rinna hnathawh tinrênga a thiltihtheihnaa a hlawhtlintîr theihna tûrin, kan ṭawngṭaisak fo ṭhîn che u a nih hi.

Mihring tumna leh beihna aṭang ngawt hi chuan ṭhat chhuah a har hle ṭhin a, theih chin awm mah se theih loh chin a awm bawk ṭhin. Mihring ṭhatna hi chuan phûtlêt a nei ṭhin a; thlarau rah – ṭhatna erawh chuan phûtlêt a nei ve ngai lo.

Mihring thiltih leh beihna tam tak hi Setana chuan a duh angin a kaiher thei a. Thlarau Thianghlima zung kai nghet ṭhatna erawh chu engmahin a khawih che thei lo. Fiahna tuar chhuak thei ṭhatna chauh hi Thlarau aṭanga chhuak a ni. Hosea chuan, “In ṭhatna chu zîng ṭiauchhûm leh dai ral ta thuai ṭhin ang hi a ni,” (6:4) a ti a. Thlarau rah aṭanga ṭhatna lo chhuak chu a tlovin a nghet bîk a, belhchian a dâwl bîk bawk ṭhin.