KHAWVÊL KAWTCHHUAH

LUKA 24:47
‘Ama hmingin simna thu leh sual ngaihhnathiamna thu Jerusalem khuaa ṭanin, hnam tin hnênah an hril ang,’ tiin.

‘Khawvêl kawtchhuah’ tia an sawi ṭhin chu Israel ram khu a ni a. Khawvêl khawmualpui pathum Asia, Africa leh Europe inrina laia awm a ni a, a dang pahnih America leh Australia pawh he lai ram aṭang hian an hlat dân a inchen vêl bawk. Khawvêl hnam fing hmasa Aigupta te, Babulon te, Grik te leh Rom mite inkalpawhna lai taka awm a ni leh zêl bawk a.

Heng zawng zawng han ngaihtuah hian ruahmanna fel tak neiin Lal Isua hi Israel ramah Pathianin a piantîr a. Lal Isua a thawhleh hnua hmun hrang hranga chhandamna Chanchin Ṭha hrilh ṭanna tûr Israel ram aia duhawm leh kawtchhuah remchâng zâwk rêng rêng a awm lo. Lal Isuan, “Jerusalem aṭanga ṭanin,” tia a lo sawi pawh kha sawi âwm rêng a lo ni e.