I THU ANG ZÊLIN

LUKA 1:38
Tin, Marin “Ngai teh, Lalpa bawihnu ka ni, i thu ang zêlin ka chungah thleng rawh se,” a ti a. Tin, vântirhkoh chuan a kalsan ta a.

Mosia dân aṭanga thlîr chuan lunga den hlum hial tâwk thei dinhmuna ding a ni; mahse, Mari’n Pathian a ṭih avângin Lalpa vântirhkoh thusawi chu a ṭûl ang zêla thlentîr tûrin a Amen thlap a ni. Hetianga vân lam rorêlna ‘I thu ang zêlin‘ a tih theih avâng hian a Fapa ngei pawhin Gethsemane huanah khan, a no in tûr huphurh hle mah se a Pa hnênah, “… nangma thu thu ni zâwk rawh se,” a rawn ti ve leh chiah a ni.

Mari inngaihtlâwmna hi ringtuten kan entawn ve a pawimawh hle. Amah a indah hmasa lo va, Pathian a dah hmasa a, chu chu a nun ngaihnobeitirtu a ni. Pakhatna nih hi thiam a ṭûl rualin pahnihna nih thiam hi kan zir tûr pawimawh tak a ni. Pathian mi hman langsâr tak tak hote hi mahni duh dân aia Pathian duh dân dah lal zêl hote an ni châwk. Thlarau thilpêkahte pawh duhthlang thei kan ni lo, min pêk ang ang Amen a, tihpun tum zâwk tûr a ni.