KA VEI ZÂWNG-II
— Chhantea (Oriela patea)
E. Lungdar
Kan ram, kan sakhua, kan politics kalphung hi…
Kan ram hi democracy ram, ram zâu tak, politics in ram inrêlbâwlna zawng zawng a khawihna ram ti ila kan sawi sual lo ang.
Kan state bîk hi chu politics aimahin kan sakhuana, kan kristianna hi a ni ti ila a dik ti leh ti lo pâwl kan awm ngei ang. Mahse heng kan ram hmasawnna zawng zawng hi chanchinṭha zâr a kan dawn leh neih vek a ni. Tu pa politician vâng mah a ni lo a. Tu emaw party ṭhat bîk riauna vang lah a ni hek lo. Chanchinṭhain khawvel thar tisa leh thlarauah min pe a. Chumi zâr chu kan zo a ni mai. Chanchinṭha zâr a politics khêl a, politician ropui ni thei ta te kan ni. Central India lamah khuan BJP party hi sakhaw behchhan party a ni ti ila, a dik ti leh ti lo inhnial theih tak a ni ang. An kalphung erawh hi chu a Hindu ngut mai thung hian ka hmu.
Kan ram kan state bîk a politics hi kan biak Pathiana innghat a ni ve em le. Pathian thu châng ṭha tinreng ṭan chhanah kan hmang a. Campaign-naah lah hunserh ṭawngṭai nei lovin kan awm lo. Party tin office-ah Bible leh khuang a awm bawk. Pathian hi kan lanna mi min thlîrnaah chuan kan lamṭang atân kan duh vek a. A lam a ṭan ve erawh kan tum lo ni hian kan politics che vel thlîr hian a ang duh khawp mai.
Pathian rawngbâwltu leh kohhrana inhmang deuh te chu politics a inhmang ve lo tûrah kan ngai a. Politics chu mi piangthar khelh ve chi ah pawh kan ngai lo. Hei hi enge a chhan? Politics khelh hi sual a ni em ni? Pathian ṭih chunga kan ram siamṭhatna atâna politics khelh hi sual em ni? Ni lo. Tuna kan politics khelh dân hi Pathian mite tân telna tlâkah a khêl ten an hmu lo zâwk a ni. Enge a chhan? Politics hi sual nilovin kan khêl sual zâwk a. Ram hmangaihna tak tak hi midang te tân kan ti a. Keini chuan politics chu kan pumpui hamṭhatna atân chauh, kan chanṭhatna atân chauh kan khelh avangin Politics hi kan ti hmêlhem a. Pathian mite tel vena tlâkah kan ngai lo a ni. Chutianga politics khêl te chu ram leh Pathian hmêlma an ni.
Sam 24-naah chuan Leilung leh a chhûnga thil awm zawng zawng te hi Lalpa ta a ni tih thu kan hmu a. Pathian mite tân ram neitu Lalpa ram a zauh zêlna atân kan ram hi vei a, kan politics siamṭha tûra beih hi thil zahthlâk a ni lo e. Thil zahthlâk a ngaitu chuan a politics khelh dân en lêt rawh se.
Ka ram a dam loh chuan ka sakhua a dam dâwn si lo a.
Ezekiela 22:30
Ram chu ka tihchhiat loh nân an zîng ata dai theu tûr leh, ram chhana ka hmaa ṭang tûr mi ka zawng a, ka hmu si lo va.
Hawh u, ram chhiat lohna tûra Lalpa lam ṭangin politics hi i khêl ang u.
