NAUPANG ENKAWL DÂN

— Rinzuala

Kan thupui hi naupang enkawl dân tih tawp a ni a, kum lamah kan la naupang êm a, kan thu ziah te in mit a tlung lo ang tih pawh ka ring a, in hriatthiamna ka ngên hmasa a ni.

Hei naupangte hi, ram tân resources pawimawh tak an ni a, kan khawvêl rawn luah leh zêl tûr te an ni a. A bîkin kum 5 aṭanga kum 13 phei hi chu enkawl ṭhat an ngai êm êm a ni. Mi sawi kan hre fo ang a, “Têt laiin a fel nên… a len hnuah a sual tawhin a nun a va zahpuiawm e,” tih inhre ṭhin ang. Mahse hei hi an têt lai nun kan va ensakin kan hriatsak em aw tih hi ka sawi duh chu a ni a.

Naupang enkawl tûr hian mi thiam, philosopher, degree tam tak nei, sum tam tak sênga rawih an ngai lo a. Tution lâka enkawl puitlin chhoh pawh a ngai hek lo. Naupang chu BIAK INAH SEI LIAN rawh se, chu tluka ṭha a awm lo tih i hria ang u. Naupang biak in ngaina kan han chhui tawh a kan hriatah, sual an la awm tlat lo. Naupang chu a chheh vêla a awmpuite mizia ang zêlin a ṭhiante nên a behaviour a insiam ṭhin a ni.

High school leh higher, college zirlâi awm ṭha duh lo kan tih kan tih te hi an naupanlai nun han thlîr ila, inkhâwm ṭha peih lo, Lalpa leh a biak in ngaina lo an ni ṭhin a nia.

Aizawl City chhûngah hian an vai chuan a ni lo ang a, mahse ṭhenkhatah hian zânah leh chawhnuah naupang inkhâwm an tlêm ta riau mai a, hei hi nu leh pa mawh a ni. Naupang chu biak in i ngainattîr chuan a rawn puitling chho ang a, a tlangvâl a nih pawhin biak inah a tlangval hun a hmang tho tho ang. 100℅ chu a ni lo ang, mah se 80℅ hi chu a dik khawp a ni.

Mobile phone khawih tam tir lovin Bible chhiar tam tir zâwk ila, naupangin a têt lai aṭanga games a buaipui chuan a hma hun chu ngaihtuah awm tak a ni. Chu chu nu leh pa mawhphurhna a ni.

A tâwp nân kohhran hi kan Lal Isuan “Ka taksa” a tih kha keini Kristiante hian hre reng ila, chhûngkua kan din a nih chuan Joshua angin “Kei leh ka chhûngkua erawh chuan Lalpa rawng a ni kan bâwl dâwn ni” tiin kan fate pawh biak inah i sei len tir ang u.