GOLIATHA TAM TAK
— Joseph Bawlte
Rahsivêng, Lunglei
Mizo Literature huanga kan pa ti a kan sawi theih, KC Lalvunga, Zîkpuii Pa ti a kan hriat hian a article pakhat ‘Zirlaite hnêna thuchah’ tih a zirlaite kaihhruai nâna ‘Huaisenna’ a thlang hian hmathlîr a lo neih thuizia leh ṭhatzia leh mi ropui a nihzia a tilang chiang hlein ka hre ve tlat! ‘Taimâkna’ thlang lova ‘Huaisenna’ a thlang zâwk hian chona nasa tak min siamsak a ni. Krista zuina kawngah pawh hian huaisenna kan mamawhzia hriatna chu; Lal Isua’n, “Tu pawhin mi zui a duh chuan mahni hrehawm pawisa lovin a kraws puin mi zui rawh se,” a tih kha a ni.
Zaithiam tak niin, hla nalh tak tak phuah mah ila mipui hmaa ding chhuaka sak ngamna ka neih si loh chuan ka zaithiamna leh hla phuahthiamna hi Lal Solomona’n, “eng mah lo mai,” a tih ang chauh kha a ni dâwn a ni.
Philistia mite ṭanhmun aṭanga Goliatha’n Israel fate a va cho khân Israel fate khân râlthuam ṭha tak tak nei mahse an râlthuam hmang tûrin ‘huaisenna’ an nei lo a ni. Davida erawh chuan, “Amah avâng chuan tu ma rilru zâm suh se; i chhiahhlawh hian chu Philistia mi chu ka va bei ang e,” tiin râl pawh la bei lo naupang tê khân huaisen takin a ti ngam a ni. Engtin nge a tih theih mai le? A huaisen tlat vâng a ni.
Zîkpuii Pa vêk hi han sawi leh ta ila; Chile rama a awm laiin a rinawmna avângin an hotupa nên an inhmu thiam lo a, Chile ram aṭangin India-ah rawn thawn haw a ni a, a hnu daihah an hotupa chuan Mizo dang hnênah, “Lalvunga hi Kristian ka hmuh chhun a ni,” a ti leh si! A rinawmzia chu Kristian ni lo-in a hmu a, a tîrah hrem mah se, a tâwpah a fak. Hotute laka tlâktlum emaw, fak hlawh emaw duhna avânga an thu apiang pawm zêl hi fak leh duhsakna hlawhna a ni tak tak ngai lo. Sam ziaktuin, “Lalpa chu ring la, thil ṭha ti rawh; He ramah hian awm la, rinawmna ûm zêl rawh,” tih hi Lalvunga nunah hian a va lang chiang tak êm! Diknaa a din tlat ngamna leh thudik a ṭan tlat ngamna hi a huaisenzia tilangtu a ni.
Thanpuii Pain, “Huaisenna hmêlma lian ber chu dawizep a ni. Dawihzepna hian rinawm lohna a siam a, rinawm lohna chu mi huaisen hmêlma a ni,” a tih hi a va han dik tehlul êm! Dawizepna avângin dâwt kan sawi a, dâwt kan sawi veleh mi rinawm lo kan lo ni mai ṭhîn. Kolossa khuaa mite hnêna Paula’n, “Dawt inhrilh tawn suh u; mihring hlui chu a thiltihte chawpin in hlîp tawh a, mihring thar chuan in inthuam tawh si a, chu mihring thar chu hriat famkimna nei tûrin, a siamtu anpui anga siam tharin a awm mêk a ni,” a tih ang khân Lal Isua zuitu, Amah avâng tuar ngam, chân ngam, rethei ngamte inti te hi chuan thudik hi langsâr lo pawh nise kan ṭan zâwk tlat tûr a ni.
A nuamsa chin chauhva Isua zuitu chuan a daih rei ngai lo tih hre reng la, chuvângin i nunah Goliatha pakhat mai ni lo Goliatha tam tak i hmachhawn theih nân Pathian bel tam rawh.
