HUN ṬHA I LA NEI

HUN ṬHA I LA NEI

– Vanlalnghaki

I nun khan mi vanneihna ang chang ve lo mah se, khawvel thil zawng zawng aia hlu zâwk, van lal Fapa kha mitin tân ani tih hrereng la. Mi awhawm tak emaw i tih te pawh kha nangmah angin an lungngai ve fo va, mi hlimtak emaw i tih ṭhin te hlimna pawh khan i hlimna ai sang a tawng thei bik chuang lo tih hria ang che.

Kan khawvel hman dan chu eng pawh lo niin dinhmun in ang lo takah ding ṭhin mah ila, vawikhat pianga thi leh tur… lei a kumhlun lo tur leh Pathian rorelna hmaa la ding tur vek kan ni.

Mi rethei lawmna chu thil hote anih laiin mi hausa lawmna erawh tam tak a ni ṭhin. Lawmna leh hlimna te, vanneihna te hi kan thil neih aṭanga teh tur a ni lova. A dawngtu dawnsawn dan leh ngaihhlut danah a innghat mai a ni. Khawvela lungawi tumin khawvel thil atchilhin inbawhbeh tir lo la, chatuan nunna i chan theihnan i lei taksa ṭawihral leh mai tur kha Lalpa tan ui lovin hlan zâwk ang che.

Lawmna kim chatuan daih ila chan ve theihnan i lei hlimna leh lawmna, i hmangaih thlengin kalsan inhuam la… i hun kaltawh chu engpawh ni se, vawi tamtak Lalpa tlûksan in, ngaihdam theihloh khawp hiala sual niin inngai mah la, khawvela i la awm a, i la thâwk ve chhûng chuan Isua panna hun ṭha i nei tih hria ang che.

Khawvel mite chuan an ngaidam thei lo che a ni thei, i thil tihsual an hre reng anih pawhin i sualna zawng zawng ngaidama chatuan nunna pe theitu che Isua lam en tlat la, i awm ang leh i nihna zawng zawng nen, kawng dik zawh thei tura pui thei tu che Isua hnen pan ve rawh le.

LALPAN MALSAWM RAWH SE.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.