VEI ZAWNG

VEI ZAWNG

– Vanlalnghaki

Nu leh pate, kan fate thlarau nun hi kan vei takzet em le? Nge khawvel thil takin tisa thil chauha an hlawhtlin na tur ringawt hi kan buaipui ṭhin aw! Min chhâwk hahdam tur leh min pui tur te, nuamsa taka min awmtîr tu atân leh kan thuawih em em tur te in kan duh a. Kan fate thlarau a himna tur leh an thlarau damna atan hian eng chen chiah nge kan inhuam aw?

I fa a ruih reng lai khan a ruihna tur sum i pe ziah a ni lovem ni? Engnge a chhan? A lo piangthar a, Lalpa lam a lo hnaih ta a… Pathian thu a tuipui em em a, a nun chu siamthar in a awm mêk a ni. Mahse engmah thawk si lo, nuna hmuh tur awm bawk si lo tiin i sel lehnghal mai dawn em ni. Kan rin Pathian, a thu kan sawi fo ṭhin hi thildang zawng aiin kan thlanga kan ngai pawimawhin kan dah lalber a ni tih hi kan fate hnenah hian i lantir ang u. Kan lawmna te hi Pathian lam thil a nihzia a takin lantir ṭheuh ang u.

Kan fate’n thil dang zawng aia Pathian thu an buaipui anih chuan lâwm tur kan ni lo em ni? Upa zâwk chu reitak rinna kawng zawh tawh a ni a, mahse kan fa la naupang em em piangthar hlim ve te hi chuan Pathian hriatchian leh a thu zirchian te hi an mamawh em em asin, i sawisel lo teh ang u.

Langsâr taka fel duak duak a, an nuna hmuhtur kan zawn nghal chung hian kan hmuh tum ang kan hmu ṭhin si lo. Nghet taka zung kaih tur hian a rin Pathian hriatchian te hi a mamawh ve bawk asin. Kan ṭawngkam leh kan nundan hi fimkhur ila, ṭhahnem kan ngai emaw kan tih lai hian kan ṭawngkam te hian an chhûngril a hliam leh fo ṭhin.

Engkimah Lalpa râwn chung zelin Lalpa thu ngaichâng zêl ang u.

NILEN NUAM ULE.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.