PATHIAN THIL TUM

– Vanlalsanga Tochhawng
Khawbung

Pathianin lei leh van a siam lai khan, khawiah mah sual a siam lo va. Mahse, sualna tùr thil tam tak a siam a, a thil siam te zîng aṭangin sual chu rawn inṭanin, a siamtu aia ropui duhna leh chungnun duhna thinlung chu lei mihring awm hma a thil thleng tawh ni mah se, tun thleng hian thu thar leh thil thar ang rengin ala thawk a.

Vana inṭan tawh sual chu mihringah lùtin, mihringa lùt sual vék chu a kuta awm leia thil tinreng chungah a lo lang chhuak ta zêl a. Leia thil awm tinreng chu sualna tûra hmanraw rem chângah an lo chang zo va, lei chu in pâwng nékna in a khat zo vek a nih hi.

Chu sual avang chuan thihna te, natna te, lungngaihna te, ṭahna, rùmna, manganna leh khùarél chhiatna kan tih zawng zawng hi sual rah chhuak; sual vanga leiin ânchhia alo dawn tawh a nih miau avangin, héng thil lakah hian tu nge ka fihlim intithei awm bik chuang ang le?

Mi tam takin, khawvél ka chén han inti mah se, an chen hma daihin sualin minlo chén da zo tawh a. Chen leh tlâk awm lo khawpa chhia emaw tih turin, rah ṭha pakhat mah min pék a nei lo va. A chéntuteah, inchhirna leh hrehawmna bâk a thlen ngai lo va, a tâwp phei chu chatuan thihna a la ni leh zel bawk nen.

Chu ânchhe dawng tawh khawvêl, suala tlu tawh khawvêl, chen tlâk awm lo, sualin a fanchhuah tawh khawvêl, hmangaih tlâk awm miah lo khawvêl chu Siamtu Pathian chuan a hmangaih a. Tihdam a, siam ṭhat a, lei thar leh van thar, sualin a khawih phâk loh chu din tumin a Fapa mal neih chhun chu min pe ta zâwk a ni (John 3:16).

Chu Isua chuan kan lungngaihna leh manganna te, rùmna leh ṭahna zawng zawng lak aṭanga min Chhandam hi a duh a. Khuarél chhiatna emaw, vanduaina kan tawh palh pawh a, chùng thil tena a tih chhiat phâk loh nun thurûk chu min pêk miau tawh avangin, Pathian mite tân chuan chhiatna leh vanduaina hi a awm tak tak thei tawh lo va, engkim chu kan ṭhatna tùr zâwk a ni tih hmuhthiam theihna mit chu Lalpa’n a pe tawh a ni.

I nunah harsatna tâwk lo turah inngai lo la, chutiang i lo tawh hunah pawh a lâk kian theihna turin dîl hek suh. A khawngaihna hi kan tân alo tâwk reng tawh zâwk avangin (2 Kor 12:7- 10); chu harsatna tinreng chhûng aṭang chuan a aw min hriattîr hi a tum vang a ni. Chutiang tena a bawh thlúk zawh loh nun kan nei a ni tih fiahnân, harsatna hrang hrang hi kan tawng ṭhin a ni tih hi ringtuten i hmuthiam mawlh teh ang u khai.