KOHHRAN HI (Thlirna tlang dang)
– Chhantea (Oriela patea)
E. Lungdar
Khawvêl ṭhangzêl in a ken tel social media vêl ah hian tunhma deuh aṭang tawhin kohhran sêlna, deuna leh demna hmuh tur hi a khât tâwkin a awm ta fo mai. A zia lo tak tak a ni. Kohhran hi a neitu leh dintu chu Pathian a ni tih kan hriat loh vâng te pawh a ni mahna.
Chutihrual chuan engatinge kohhran hian heti taka sêl, deu leh dem a hlawh tâk fo le? Pathian ina a din leh enkawl kan tih fo lai hian engatinge hetiang hi a tawh tâk fo ni ang le.
Kohhran chhûngkua mimal nunah hian Pathian ṭihna nun a tlahniam a. Chu chu kohhran ah kan senglût ta mai em ni aw tih mai hi a va awl êm. Kohhran a nihna neihte hi kan pâwnlam nihna landân thup mawi tumna hmanrua mai ah kan ngai ta em ni ang. A neitu leh dintu Pathian mah nise a enkawltute hi mihring kan la nih chhûng hi chuan fel tâwk lo te pawh lo awm ang hmiang kan ti em? a dik lutuk. Mahse, tunah hian mahni awmna kohhran ṭheuh kha lo zirchiang ta ila, kan kohhran hian thlarau lam nuna kan hmasâwnna tûr nge a vei thilpêk. Biak in insak mawi siakna, thawhlawm inthawhtam tum siakna ah hian kan lût ta mai lo maw. Thlarau bo te veina tak tak leh kan beramte krista huanga hruai thlen ai chuan thilpêk tam te hi kan tum ber em? Krista kebul a mite hruai thlen aiin a behbawm kan vei ta lutuk em aw… Pathian ṭihtu aiin thawhlawm thawh tam thei thei hian chanvo an nei ṭha zâwk em. Khawvêl thila fing leh thiam te aiin Pathian ṭih tute hian kohhran chêtvelna ah hian tihtur an nei tlem tial tial em le. Kohhran sêl, deu leh Pastor leh upa te sêl te chu pulpit tlâng aṭangin kalsual leh kohhran leh Pathian zah lo ang thaw thangin thu in kan chumchilh a. Mahse mahni insiamṭhat kan tum si lo. Hei hian kohhran chhûngkuaah in tentawnna a thlen a. Mahni theihna mual mual ah kan vei zawng kan puah pui ta mai te a ni lo ang maw. Sêl, deu leh demna hi insiamṭhatna atân kan hman thiam ve fo te pawh hi a fuh ang kohhran ten.
THUPUAN 3:1-2
“Sardis khaw kohhran tirhkoh hnênah pawh heti hian ziak rawh: ‘Pathian Thlarau pasarih leh arsi pasarih neia chuan heti hian a ti. I thil tihte ka hria; thi reng siin nunga i than hi; intiharh la, i thil neih thi lek lekte chu tinung leh rawh. I thiltihte chu ka Pathian mit tlung zo a awm lo va ni.
Sardis kohhran hnêna thuchah hmang hian kohhran te hi i in enfiah ve ang u. Sardis kohhran ho pawh thlarau lam pachhe tak, ro ve tak an ni a. Chutih laiin mite hriat tham loh, mi tlêmte chauh Pathian thu a ding nghet an awm a. A nâwlpui chuan lanmawi tum hle mahse thlarau lam nun ah chuan thi tluk an ni. Hetiang chiah hian tunah pawh… landan a kohhran mi tak, rawngbâwlna leh chanvo pawh ṭha tak chang, thilpêk ah tam tak pe thei, chhûngril nun erawh chu Pathian thu ah thi tluk ni si hi kan tam lo maw?
Induhtâwk tak, thawhlawm avânga tumah mamawh lova inhria kohhran, sum leh pai a hausa tak, thlarau lama hmasâwn tum silo kohhran kan nih chuan hawh u, a neitu Krista tân i insiam ṭha ang u.
Lalpa’n a thu malsawm rawh se.
One Comment
B. Lalhlimpuia (Mahlima)
Fuihna tha tak a va ni em.. Hetihian ka ngaihtuah thin. Engatinge Kohhran ah hian kan thalaiten inkhawm an chak tak reng reng loh! kan thil ruahman leh programme duan ah te hian tel an chak loh chu sawi loh an hmuhsit tak?! A chhan ni a ka hriat chu maw, Lalpa hi kan rorelna ah hian thutlukna hi minsiampui tur hian kan meeting hma daih atang hian ka dawr reng reng lo em ni ka ti! Anihna tak ah chuan Thu pawimawh mite thlarau nghawng thei a nih dawn ngat phei chuan, programme kan duan hma thlakhat tawp te hi chawnghei in emaw nghei lo pawh in Lalpa hi dawr ila, ka sawi tawp ngam 100% in, Lalpa hi a che khawp ang. Kohhran hi a va han nung dawn tak em. A rawng kan bawl a tisa lam ah. Mahse thlarau lam a rawngbawlna diktak Tawngtai kan hmaih leh si a ni mai lo maw.. !! Pathian aw.. hrekhawp a dawr Kohhran hruaitu hi engzah nge awm.. i chhut teh ang. Fianrial a hun hmang ngai reng reng lo hruaitu chu thlarau ah hian a va ro dawn tak ka ti. Engtinnge mihring te chu a man theih tehlul ang ni Isua nen an lendun loh chuan. I inngaihtuah ang u. Inkhawm hi a tha, thlarau chaw kan lakna hmun tur a ni. Mahse inenfiahna tur hi kan nei ve zel a, hawh u kan tlai hma hian i insiamtha ang u hmiang..