PATHIAN THUPÊK ANGA RAWNGBÂWL

PATHIAN THUPÊK ANGA RAWNGBÂWL

— Joseph B. Zomuanpuia
Rahsi veng, Lunglei

DEUTERONOMY 4:2
“LALPA in Pathian thupêk ka pêk che u hi in pawm theihna tûrin, thu ka pêk che u hi in belhchhah tûr a ni lo va, in tikiam tûr a ni hek lo.”

Mosia hian Israel mipuite hi Pathianina ram luah tûra a pêk an luah huna Pathian rawng an bâwl dân tûr hi a hrilh nasa êm êm a. Kan tûnlai rawng bâwl dân hi han en ve ta ila; Pathian thupêk leh duh dân ai hian keimahni duh dân leh țha tih dân hian rawng hi kan bâwl tawh em ni âw a tih theih a ni.

Pathian rawng kan bâwl a nih ve si chuan a rawng kan bâwlsak Pathian thupêk leh duh dânin kan bâwl tûr a ni. Keimahni duh dân leh țha tih dân hi pakhatmah a tel ve thiang tawh lo.

Pathian thupêk ang lova rawng bâwl chu Lal Saula nun ațang hian a pawizia a lang. Pathianin Amalek-ho bei tûr leh an thil neih zawng zawng; a hmei a pa leh nausên te, hnute hne lai te, bâwngpa te, berâm te, sanghâwngsei te, sabengtung te tihlum vek tûrin thupêk a pe a. Amaherawhchu, Pathian thupêk a tikiam ta tlât mai! Zawlnei Samuela nên Gilgal-ah an intâwk ta a, Saula chuan lâwm êm êm in, “LALPA thupêk ang chuan ka ti ta e,” tiin Samuela chu a hrilh a; nimahsela, Samuela bengah chuan berâm bê leh bâwngpa bû ri a lut ta tlât mai!

Saula chuan Pathian hnêna inthawi nâna a lo hawn ve a ni si a; amaherawhchu, Pathian thupêk ang lova Pathian rawng a bâwl tâk avângin Samuela chuan, “LALPA thu i duh loh avângin ani pawhin lal atân a duh ta bîk lo che a ni,” tiin a hrilh ta tlât mai! Saula chuan, “Thil ka tisual dêr mai a ni, LALPA thupêk leh i thu chu ka lo bawhchhe reng mai a nih hi, mipuite ka hlauhva, an thu ka lo awihna lamah hian,” tiin thiamthu a sawi ta zuah zuah mai. Nimahsela, Lalpan thupêk a chhuah tawh avângin a thupêk ang chuan lal atân a hnâwl ta a.

Rawngbâwlna kawngah hian vên tûr dik Pathian mitmei vêng lo hian kan rawngbâwlpuite mitmei zâwk hi kan lo vêng ang tih a hlauhawm khawp mai. Pathian thupêk anga rawng kan bâwl țhin loh avângin kan rawngbâwlna te hi a nung thei țhin lo. Engtin nge Pathian thupêk chu kan hriat theih tâk ang? Pathian thupêk hre tûr chuan Bible-ah kan lêt leh a ngai a ni.

HEBRAI 4:12
“Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni.”

avatar
  Subscribe  
Notify of
Copyright © 2017-2020 Our Daily Bread Mizo.
Privacy Policy