SUANGTUAHNA VÂK VEL

– Vanlalnghaki

Ti hian ka ngaihtuah a, kohhran ah Pathian ram kan pe ṭun ṭun a… a dang tam tak hi a sum ang zawng hian rawng kan va bâwl nasa êm. Hla taka mi thim, Pathian thu awihlo te hnenah kan sumin rawng kan bawl a, kan sum hian engnge a zu thawh chiah a, kan rawngbawlna hian thlarau bo engzat tak chhanchhuak ang maw? kan ngaihtuah zui ngai em aw.

Kohhran kalphung anih avangin kan thawh mawl tawp nge… thlarau bo veina leh hmangaihna thinlung pu chungin? Pathian ram a lo zauh zêl nan ṭhahnemngai takin kan thawh takzet em le?

Kan hmuh phâk loh leh kan sum hmanga kan rawngbawlna chu engpawh lo ni se, ka rilrua awm zâwk tak chu, kan ṭhenawm khawveng leh kan bul hnai maiah pawh hian mi rethei leh harsa em em, ṭanpui ngai ngawih ngawih te, natna tuar te leh ruihhlo avanga buai, chhanchhuah mamawh ngawih ngawih te an tam si a, heng te hi tlêm tal hian vei ve deuh ila ka va ti êm!

Ṭanpui an ngaih chhan chu engpawh ni se, puih ngai chu kan pui mai tur a ni dawn lo em ni? Kan hmangaihzia leh an thlarau boral mai tur hi chhanchhuah kan duh in puih kan duh em em a ni tih hi vawikhat chauh tal lantîr ta ila. Mi dang tih tura dah mai lovin leh kan hmuh phâk loh te chauh vei lo hian, kan hmuh phâk leh kan bul vela thlarau bo chhanchhuak tur hian han harh thar suau suau mai ila a va ropui dawn êm!

Kan veng chhûng kan ṭhenawm ami te ngei hnenah hian.. hmangaihna Isua aṭanga chhuak ngei mai kha lantîr ila, a rah chhuah duhawm tak vangin keimahni lamah pawh hlâwkna nasa tak kan têl ngei ang. Rilru dik tak pu a kan tih phawt chuan Lalpan mal a sawm dawn si a.

Min hmangaih tute tuma’n kan haw ngai lova, rawngbawltu leh kohhrana inhmang tak chung si a miten min eiloh fo ṭhinna chu, Hmangaihna Dân kan zawh loh vang a ni. Hmangaihna nen kohhran leh khawtlangah rawngbawl ila, a rah chhuah kan hmuh phâk ngei tur te hnenah hian rawngbawlna ṭan ila, kan thlarau nun kan va inchawm tawn nasa lehzual dawn êm!

Kan rilru ah Mizo te chu Kristian vek kan nia, Pathian thu hrelo kan awmlo kan ti a ni thei, mahse mi a dam a, a la thâwk ve ṭek ṭek chhung chuan a nunah Lalpa a la beidawng bîk lova, keini pawn’ kan beidawn san mai tur a ni .

Thawhlawm thawh chung siin kan bul vêl ami te hi i hlamchhiah chuang lo ang u.