JAKOBA 1:19-20,22 — Unau duh takte u, chûng chu in hria e; nimahsela, mi tinin ngaihthlâk chuh sela, thusawi chuh lo sela, thin tinel rawh se; mihring thinurnain Pathian felna chu a siam si lo. Nimahsela, thu ngaithlatute mai ni lovin, zâwmtute lo ni zâwk rawh u; chuti lo chu, mahni inbum in lo ni dah ang e.

1 KORINTH 3:21-23 — Chuvângin, tu mân mihringte chhuang suh se. Engkim hi in ta a ni vek si a; Paula emaw, Apollova emaw, Kipha emaw, khawvêl emaw, nunna emaw, thihna emaw, thil awm sa emaw, thil lo la awm tûr emaw, a zavaiin in ta vek a ni; nangni pawh Krista ta in ni a; Krista pawh chu Pathian ta a ni.

JAKOBA 1:5-6 — In zîngah tu pawhin finna a tlâkchham chuan, mi zawng zawng hnêna hau lo leh ui lova pe ṭhîntu Pathian chu dîl rawh se; chutichuan, a hnênah pêk a ni ang. Nimahsela, ringhlel hauh lovin, rinna neiin dîl rawh se; ringhleltu chu tuifinriat fâwn, thli chhêm lên leh vawrh ang a ni si a.

EPHESI 4:25 — Chutichuan, dâwt sawi bânin, mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a.

TIRHKOHTE 28:23 — Ni an tiam a, chumi niah chuan a thlen inah a hnênah mi tam tak an lo kal a; zîng aṭanga tlai lam thlengin an hnênah chu thu chu a hrilhfiah a, Pathian ram thu a hriattîr a, Mosia Dân Lehkha thu leh Zâwlneite Lehkhabu thuin Isua lamah anmahni a thlêm a thlêm a.